لا أخفيكم سراً هي تجربتي الأولى في التدريب، معرفتي العملية تعتبر شاحبة إلى حد كبير جداً
ولكن قررت أن اتحدى ذاتي كالعادة وأن أخطو الخطوة الأولى بكل ثقة
وفعلا… وبكل ثقة ألقيتُ بنفسي في التجربة لأشهد أصعب 3 أيام في حياتي، وهي الساعات الأولى لتدريبي، صمت قاتل يحيط بي هناك ونظرات غريبة تشعرك بأنك دخيل على المكان
ولسبب أجهله انقرضت الفتيات من الصيدلية هذا العام عدا تلك الفتاة المسؤولة عن صندوق الحساب، على عكس العام السابق الذي تجاهلت التدريب فيه
اتجهت فور دخولي إلى الصيدلي المسؤول وصاحب الصيدلي وصديق الطفولة لوالدي والذي لم أره من تلك اللحظة ولا حتى لمرة واحدة-لأعرفه بجنابي- ليبدأ هو بتعريفي على الأساسيات وبشكل سريع فلما لحظ استغرابي وحالة الذهول التي تملكتني
@ ايه يا دكتورة هي أول مرة تدربي ولا ايه؟؟
# بصراحة آه
@ لحد دلوقت؟؟ لحد سنة تالتة؟؟!!! لا يبقى انتي كده عايزة نظام تاني
# أنا في بالي – نظام تاني نظام تالت المهم تعلمني عشان الضياع الي انا فيه ده
@ يا أستاذ خالد!!!
# هي فيها خالد لا خلاص أنا مش عايزة أدرب
@ الدكتورة جديدة تخلي بالك منها وأي سؤال أو استفسار تساعدها
# يا حلولي يا حلولي خالد الي هيدربني…..كملت….ثم ايه أستاذ دي هو صبي صيدلي ولا ايه… أنا عايزة اروح مش هــــــــــدرب
واتضح فيما بعد أن أستاذ خالد بكالريوس تربية قسم لغة انجليزية
-يالا اهو أحسن ما كان دبلوم …. أحمدك يا رب
ربما خبرته سبقت خبرتي بمراحل وربما اضطررت لسؤاله، غالباً كانت تأتيني إجابته على مضض كأنه لا يقوى على الكلام ولكن ما هيّ إلا أيام وأصبح لا يبخل عليّ بل وبدأ يقدم تلك النصائح من تلقاء نفسه
ارتبط تدريبي وتوقيته بتوقيت عمل تلك الفتاة المسؤولة عن صندوق الحساب بمجرد مغادرتها أغادر وإن لم تأتي فأنا في إجازة
ولكن خلال ذلك اليوم سؤالان فقط شغلا تفكير
هو ممكن أدخل مثلاً مثلاً عيادة دكتور أسنان
ألاقي الدكتور بيتقال له يا أستاذ؟؟؟؟ أو الدكتور مش دكتور؟؟؟
أكيد طبعاً لأ…طب اشمعنى احنا
ليس اعتراضي على مهنة Assistant
فهي موجودة في كثير من دول العالم ولكن بضوابط
في إحدى الدول العربية التي عشتُ بها لفظة Assistant
تطلق على مساعد الصيدلي والذي لايمكن أن يسمح له بتحمل مسؤولية صيدلية بمفرده مهما بلغت درجة خبرته، فوجود صيدلي شيء أساسي إهماله أو التهاون في يعرضك للمسألة، القانونية ومش بعيد يشمعوا لك الصيدلية بالشمع الأحمر
ربما حال الصيدلي هناك لا يختلف عن هنا كثيراً من حيث الثقة والنظرة العامة ولكن على الأقل تصرف كهذا يشعرني بحفظ حقوقي واسمي وأضمن أن لا أنادى في يوم من الأيام بـ يا أبلة أو يا آنسة
أعلم أن التغيير صعب، ومهما حاولنا في بلدنا الحبيب فلن تتمكن التشريعات مهما بلغت قوتها أن تحمينا، ذلك التغيير الذي نطالب به لن يكون إلا بنا وباقتناعنا أن حالنا أصبح لا يسرّ عدو ولا حبيب، وإن كنا نطمع في التغيير فهو من جيلنا هذا وليس من أحد آخر
أخيراً..السؤال الثاني الذي شغل تفكيري منذ تلك الواقعة التدريبية الفذّة ربما هو سؤال عادي للبعض… ولكن اعذروني … صدقاً لم اختلط بالناس لهذه الدرجة ولم أشهد سوق العمل من قبل
ولا أدري في أي دول العالم يمكن أن يعمل المدرس كـAssistant وليس في موقعه الوظيفي الطبيعي
ومما سبق يتضح أننا
كلنا في الهوا سوا
وعمار يا مصــــــــــــر
ما كتبته عن: صيدلانية تحت التجريب
التعليقات
الأقسام
مدونات صيدلانية
للاسف هذه مهزله نراها فى مصر فقط
اغلب الصيدليات المسؤول عنها بكالوريس حقوق او تربية او دبلوم
وعشان المشكلة دى تنقرض لابد من وقفة للصيادله ونقابه الصيادله
ياريت كل صيدلى يراعى ضميره ومش يبيع اسمه لاى واحد معاه فلوس عشان ياخد بيه تراخيص الصيدليه ويجيب بيها دوا
ياريت نقابه الصيادله تعمل دورات تفتيش عشان تتاكد ان اللى بيدير الصيدليه صيدلى ومش مجرد اسم محطوط جنب اليافطة بادارة الدكتور فلان
وللاسف المشكلة اكبر من بكالوريوس واخد مهنه صيدلى
دة كمان واخد مهنه طبيب
وبشوف بعينى الناس رايحة لوحد فى صيدليه ويدور الحوار كالاتى
الست الغلبانة : والنىب يا داكتور
بكالوريوس الحقوق : ايه يا ست
الست الغلبانة : ابنى بقاله يومين مخنوق كدة ومش بيتنفس كويس وبيكح اوى
بكالوريس الحقوق : الكحه ببلغم ولا ناشفة يا حاجة
الست الغلبانة ” وهى مش دريانة ” بيكح اوى وبيجيب حاجات كتير وبيرجع كمان
بكالوريس الحقوق يرد ولا اجدع دكتور : خدى يا حاجة اديله من دة تلات مرات بعد الاكل كل يوم
وبقدرة قادر بقى دكتور بيشخص وبقى صيدلى بيكتب دوا
ياريت تنتهى المهزله دى ومش هتبدا غير بوعى ويبدا من الصيادله نفسهم
رد من طالب طب مخنوووووووووق
هى فعلا حاجة تغيظ جدا
والاكتر لما يحسوا بجد انهم دكاترة
الفاضل/طالب طب مخنوق…
كما استنتجت فنحن فعلاً في الهوا سوا كلنا بلا استثناء
وبالنسبة للحوار الذي ذكرت في تعليقك
أؤكد لك انني ارى يومياً ما هو أكثر من ذلك
أعانكم وأعاننا الله
الفاضلة / حبيبة
واضح إن جميع الأطباء متغاظين من مساعدين الصيدلي كذلك
هل اعتبر ذلك هجوم على مهنة Assistant بشكلها الحالي؟؟؟ ودعوة للتغير من جيل بدا يدرك أنها مأساة؟؟؟
كم أتمنى ذلك
مروركم بمدونتي أسعدني حقاً…
لا اقول ان هذه الكارثه فوق رؤوس الاطباء فقط
ولكن لا يشعر بها حتى الان الا الاطباء
هذا عن الشعور
ولكن عن الكارثه فى حد ذاتها
فهى فوق رؤوس الجميه
طبيب او مريض او صيدلى
انا لا آمل فى تغيير الوضع ليصبح الصيدلى ” صراف روشته “
انا آمل ان يتغير الوضع الى الوضع الحقيقى
بمعنى ان الصيدلى هو اللى يكتب الدوا بنفسه
الطبيب يشخص ويكتب ملاحظاته
الصيدلى يكتب الدوا
لا اخفيكم سرا
حكايه ان الدكتور يكتب دوا خانقانى جدا
امال الصيدلى لازمته ايه
يصرف روشته !!
لا طبعا
لو هنقول عايزين ايه
هنقزل عايزين صيدلى بمعنى صيدلى الذى يعرفه العالم كله كمصطلح معبر عن مهنته
وعايزين طبيب كطبيب يعرفه العالم كله كمصطلح يعبر عن مهنته
وكما قلت
مش هتبدا غير من عندكم انتم يا صيادله
واحنا نتبعكم
والاعلام يتبعنا بانه يوعى الناس
اظن لو اهتم الاعلام بالمساله دى هيكون احسن لنا بكتير
اسال الله ان يتغير الحال قبل ان ينقلب لضده ويظهر اعراضه علينا جميعا
أخي الفاضل…
جميل جداً أن نجد من يفكر مثل تفكيرك ومقتنع بدور الصيدلي بهذه القوة بين -ولاد عمنا- من الأطباء
أكدت لي مقولتي بأني التغيير سيكون من جيلنا هذا فعلاً طالما فيه من هو مؤمن بالتغيير وبأن لكل منا في مجال الرعاية الصحية دوره الخاص ونرفض الدخلاء علينا
عندنا في دولة الإمارات التشريعات صارمة بالنسبة لعمل المساعد والصيدلي والحملات التفتيشية ما تقصر ..لكن لا بد من وجود مخالفين مهما كانت الدولة صارمة في تطبيق تشريعات الصيدلة ..سعدت بزيارة مدونتك يا دكتورة قطر الندى
مدونتك ستكون إحدى محطاتي دمت بود
الفاضلة/ فتاة الحزن
أثناء قراءتي تعليقك هنا تصفحتُ مدونتكِ بشكل سريع
هي رائعة حقاً وأسعدني وجود رابط مدونتي على صفحاتكِ هناك وهو شيء أفتخر به
عزيزتي مدونتك الآن في مفضلتي
سعدت بمقابلة فتاة إماراتية بتفكيرك الراقي ذاك
ووحشونا أهل الإمارات جـــــــــــــــداً
بالنسبة لردكِ…
أعلم أن الإجراءات في الإمارات صارمة والرقابة صارمة وشهدتُ ذلك بنفسي وأشهد لهم بالجدية والاهتمام حقاً
مهما كانت المخالفات عندكم فتأكدي أنها لن تتفوق على مخالفاتنا هنا
ببساطة من السهل السيطرة على شعب الإمارات من حيث التعداد والتنظيم مثلاً
ولكن كيف لك أن تسيطري على 75 مليون مصري
ومراقبة آلاف الصيدليات….
نأمل أنه حتى إن لم يكن بأمر القانون فسيكون بالضمير الصيدلي الواعي
السلام عليكم :
بصراحه مش عارف ابدأ منيين الاول اعرف نفسي بس من غير استحقار .انا دبلوم فني صناعي جاهل يعني ودلوقتي شغال في صيدله مشهوره وعايز اكون ان شاء الله مساعد صيدلي انا هاتكلم من اللي انا عايش فيه طبعا استحاله مهما يكون المساعد ذو خبره كبيره مش هايوصل عمره ان يكون ذي الصيدلي .الصيدليه اللي انا فيها كل مايجي صيدلي يتعلم ياخد الخبره ويقف علي رجله وبعدين يسافر فهنا صاحب الصيدليه يجييب مساعدين يتعلمو وبعدييين يوقفهم مع الصيادله او مكنهم مش عارف العيب في مييين .انا كرهت حياتي بسبب اني دبلوم بس الناس مابتعزرش دبلوم يبئا جاهل ويعملوه معمله لاحول ولاقوة الابالله .في ظروف بتخلي الانسان لازم يكون دبلوم يعمل ايه يموت نفسه. .بصراحه انا دلوقتي بئا عندي اشرفلي اني اقول ماعييش شهاده احسن اني اقول معايه دبلوم .في الشغل اللي انا فيه في دكتور بيعملني اني مبفهمش واني ولا حاجه وحسبي الله معلش انا لو اتعلمت وبئيت مساعد صيدلي شاطر وجه واحد والمفروض مني اني اعرفه حاجات خصوصا ان عندنا مستلزمات كتير اعمل معاه ايه انا لو مش كويس هاعمله نفس المعمله او اكتر من اللي كنت بتعملها من الدكتور التاني .الصيدلي ليه مهنته والمساعد مهنته انه مساعد صيدلي مش اكتر .انا حبيت المجال ده وبصراحه عايز اتعلمه بلاش علشان دي ممكن تزعلكو بلاش اتعلمه علي الاقل افهم فيه شويه.انا عندي كلام كتير اوووي بس مش عارف ارتبه ﻷني لسه جي من الشغل والساعه دلوقتي 5 صباحا .بس الصيدلي صيدلي والمساعد مساعد.والعمل كله لله.
===========
رد قطر الندى:
اخي الفاضل
لم نحقر من دور المساعد ولكن استغربنا تداخل الأدوار
ما تفضلت انت بذكره عن هروب الصيادلة بعد فترة من الصيدليات فهو حقيقة شهدتها بعد عملي في الصيدليات
لا أعلم حقيقة ما هو الحل ولكن أرفض تداخل الأدوار
فكما قلت الصيدلي صيدلي والمساعد مساعد
تقديري واحترامي وتمنياتي أن تحقق ما تريد
انا نفسي حال الصيادله يكن احسن من كده انا مش صيدلي بس مش عايز يكون مهمنة الصيدلي انه بس يصرف روشته كفايه انه وصل انه يكون صيدلي معايه في الصيدليه صيدلي جايب امتياز مع مرتبة الشرف وفي الاخر اعد علي كرسي يا بيحاسب يا امه بيبيع والله الله يكون في عونكم بتمني انكم دايما موفقين الي الخير وانكم تحققه ما تتمنوه في الخير وانا لو بايدي اي مساعده مهما كانت هاقدمها مش عيب اني اخدم صيدلي او اكون مساعد صيدلي العيب ان احقد عليه او اكره .بتمني ليكم كلكم النجاح في كل خير.الحمد لله ان في ناس لسه بتفكر تعمل حاجه للبلد انا اه دبلوم بس نفسي بلنا تعلي والناس تفهم يعني ايه علم يعني ايه حياه يعني ايه دكتور وصييدلي .انا كان ليه الشرف انا كتبت تعليق واني قريت لو حتي كلمه من اللي كتبينه.ربنا يوفقكم .السلام عليكم
===========
رد قطر الندى:
كلامك صح فعلاً
احنا برضو بنصعب على نفسنا والله
بس احنا الي عملنا كده في نفسنا
احنا لينا حقوق كتير بس احنا الي بنهدرها بإيدينا
فى البدايه احب ان اشرح لبعض الاخوه والاخوات الصيادله انا ملاحظ انكم متشددين اوى مع المساعدين اوAssistant بس لازم تعرفو برضو ان الناس دى كمان ربنا خلقلها الشغل دا علشان يصرف بيه على بيته واسرته وهو كمان ليه الفضل على الدكاتره اللى لسه بيتدربو على صرف الروشته وانا والله العظيم مع ان سنى 26 سنه لكن قومت بتدريب اكتر من 16 صيدلى كانو جايين مش فاهمين اى حاجه ولا حتى كمان يعرفوا يقرا الروشته انا بشتغل فى المجال دا من حوالى 12 سنه يعنى انا كنت عارف الصيدليه بحذافيرها قبل ما الدكاتره اللى بتتكلم ما تحط ايديها على علبه دوا لان بلا فخر حبيت مهنتى بس الحظ ما ساعدنيش انى ادخل كليتكم بس برده اتعلمت بطريقه غير مباشره وفى كليه الصيدله جامعه اسيوط كنت بحضر المحاضرات كلها مع واحد دكتور صاحبى هناك وكملت الاربع سنين وانا برده بشتغل وباروح احضر المحاضرات واحيانا كنت بدخل المعامل فى العملى بعدها قررت انى افتح صيدليه وبالفعل نفذت مشروعى على درايه وبشكل قانونى وانا حاليا بدير الصيدليه على اكمل وجه ودون اى دكتور والداوء اللى معرفوش عندى انترنت فى الصيدليه بعمل بحث عنه وبعرفه من خلال الانترنت والتشخيص ايضا بعرفه من خبرتى ومن استفادتى بالمحاضرات ومن هنا انااستحق لقب دكتور على الاقل من الناس اللى انا بتعامل معاهم مش مهم من الحكومه او منكم بالامل والاراده تصنع المستحيل شكرا جدا على الاهانات يا دكاتره